කාලීන සංවාද, දේශපාලන

බ්‍රිතාන්‍ය අගමැතිගෙන් අපටත් පාඩමක්

Off

2020/01/22 – ලංකාදීප

බ්‍රිතාන්‍ය අගමැති බොරිස් ජොන්සන් සිය කැබිනට් මණ්ඩලයට තදින් අවවාද කර තිබේ. ප‍්‍රතිඵල නොපෙන්වුවහොත් සතියකින් කැබිනට් ප‍්‍රතිසංස්කරණයක් කරන බවට අනතුරු අඟවා ඇත. පළපුරුදු ඡ්‍යෙෂ්ඨ ඇමැතිවරුන් පවා පරිවාස කාලයකට යටත් කර ඇති බව අගමැති නිල නිවසින් ලැබෙන වාර්තා අනාවරණය කරයි. ප‍්‍රතිරූපය හදා ගැනීමට වඩා රට ගොඩනැගීමට කටයුත කළ යුතු බව ප‍්‍රකාශ කර ඇත. අගමැතිවරයාගේ මෙම ප‍්‍රවේශය දෙස බ්‍රිතාන්‍ය පුරවැසියෝ බලවත් කැමැත්තක් දක්වන බව අනාවරණය වෙයි.

යුරෝපා සංවිධානයෙන් ඉවත්වන තීරණය බ්‍රිතාන්‍ය ආර්ථිකය හා දේශපාලනය කුණාටුවකට තල්ලූ කළේය. හිටපු අගමැති ඩේවිඩ් කැමරන් ජනමත විචාරණයක් පවත්වන ලද අතර යුරෝපා සංවිධානයෙන් ඉවත්විය යුතු බවට බ්‍රිතාන්‍ය වැසියන් අතරින් සියයට 51.9 ක් ප‍්‍රකාශ කළහ. එවකට බලයේ සිටි කැමරන් සිය පරාජය හේතුවෙන් ධුරයෙන් ඉල්ලා අස්වූ අතර අනතරුව බලයට පත් තෙරේසා මේ අගමැතිනියටද තත්ත්වය පාලනය කරගත නොහැකි විය. වත්මන් අගමැති බොරිස් ජොන්සන් පවා ව්‍යාකූලතාවයන්ට මුහුණ දුන් අතර රට තුළ පැන නැගුණ අන්තවාදය බරපතල ස්වභාවයක පවතින බව විචාරක මතයයි.

මෑතකදී පැවැති මහ මැතිවරණයෙන් ජය ගත් බොරිස් ජොන්සන් අගමැතිවරයා පවතින අන්තවාදී ස්වභාවය තුළ ස්ථාවරත්වයක් ගොඩනගා ගන්නට වැයම් කරමින් සිටී. එය පහසු නැත. සිය ඇමැති මණ්ඩලය පාලනය කරගැනීමේ අරමුණ ප‍්‍රධාන අවශ්‍යතාවයක් බව ඔහුට ඒත්තු ගැන්වී තිබේ. රූපවාහිනී වැඩසටහන්වලට සහභාගී වී ප‍්‍රතිරූපය ගැන සැලකිලිමත්වීම පැත්තකට කළ යුතු අතර කැපවීමෙන් සේවය කළහොත් රට ඉහළට ඔසවා තැබිය හැකි බව අගමැතිවරයාගේ අවවාදය වී ඇත. ඇමැතිවරු වැඩ කරන බව ජනතාවට දැනෙන්නට අවශ්‍ය අතර මාධ්‍යවේදීන්ට කෑමෙන් බීමෙන් සංග‍්‍රහ කරන ඇමැතිවරු එයින් සිය ජනප‍්‍රියත්වය පවත්වා ගැනීමට උත්සාහ කරන්නේ නම් තනතුර අත්හරින්නට සූදානම් විය යුතු බව කියා තිබේ.

ඩවුනිං වීදියේ අංක දහය දරන තැන පිහිටි අගමැති කාර්යාලයෙන් එන මෙම අලූත් ප‍්‍රාණවත්භාවය කැළඹීමක ලකුණු බව ප‍්‍රකාශ වෙයි. බ්‍රෙක්සිට් යෝජනාවෙන් ඉවත්වන අතර රට ඉදිරියට ගෙන යන්නට නම් මහන්සියෙන් වැඩ කර හොඳ ප‍්‍රතිඵල පෙන්විය යුතු බව අවධාරණය කර ඇත. බලයට පත්වන දේශපාලනඥයෝ කැබිනට් මණ්ඩලයේ ලොකුම තනතුර අපේක්ෂා කරන අතර එයින් පසු තම ප‍්‍රතිරූපය නංවන ව්‍යාපෘති කෙරෙහි සැලකිලිමත් වෙති. ප‍්‍රජාතන්ත‍්‍රවාදී ක‍්‍රමය පවතින කොතැනක පවා සිදුවන සාමාන්‍ය දෙයකි. රූපවාහිනී හා ගුවන් විදුලි වැඩසටහන් සහ පුවත්පත් සම්මුඛසාකච්ඡා වලින් මැති ඇමැතිවරු බලය පෙන්වන බව පෙනේ. පොදු ජනතාවට සේවය කිරීමට වඩා මාධ්‍යවලින් අවස්ථාවක් ගැනීමට වෙහෙසෙති. ඡන්දයට පසු ගමට යන්නේ නැති මහජන නියෝජිතයෝ මාධ්‍යවල පෙනී සිටින අතර ඒවායෙන් කරන ‘‘වොයිස්කට් දේශපාලනය’’ පැවැත්ම අවුල් කරන එකක් පමණකි.

මැතිවරණයකදී ඡන්දය දෙන ජනතාව හඬක් නැගිය හැකි, හොඳ ප‍්‍රතිරූපයක් සහිත චරිතවලින් රටක් ගොඩනගන ප‍්‍රයත්නයක් අපේක්ෂා කරනවාදැයි ප‍්‍රශ්න කිරිමට කාලය එළැඹ තිබේ. හඬද නැත්නම් රටකට අවශ්‍ය වැඩද යන්න කල්පනා කිරීම ජනතාව සතු වගකීමකි. බ්‍රෙක්සිට් උගුලක සිටින බ්‍රිතාන්‍යය දේශපාලනය රට තුළ නැගෙන ඇමැති ප‍්‍රතිරූප ගැලවීමකට මාවත බව විශ්වාස කරන්නේ නැත. ලෝකයේ පවතින ආර්ථික හා සමාජ තරගකාරීත්වය හා අලූතින් පැන නැගෙන ප‍්‍රශ්න දෙස සාවධාන වන ගැඹුරෙන් අවධානය යොමු කරන දේශපාලන සංවාද ඕනෑම රටකට සුදුසුය. ප‍්‍රතිපාක්ෂික දේශපාලනඥයන් මැඩ එයින් ජයග‍්‍රාහකයන් වන සංවාදවලින් පමණක් රටක් ගොඩගැනීමට පුලුවන් කමක් තිබේ නම් ශ‍්‍රී ලංකාව දැනටමත් පාරාදීසයකි. බ්‍රිතාන්‍ය අගමැතිවරයාගේ තරවටුව අපට පෙන්වා දෙන ආදර්ශය එයයි.

මිලින්ද ප්‍රශ්න

Related Posts

LankaViews

LankaViews

LankaViews

Video wall

‘නෙළුම් යාය’ බ්ලොග් සම්මාන උළෙල