කාලීන සංවාද

සොඳුරු සිත සමුගනී

Off

ආර්ථික විද්‍යාව, ගණිතය ඇතුළු ක්ෂේත්‍ර රැසක දැවැන්තයෙකු, තීක්ෂණ බුද්ධිමතෙකු, නොබෙල් ත්‍යාගලාභී විද්‍යාඥයෙකු හා සොඳුරු මිනිසෙකු වූ ජෝන් ෆෝර්බ්ස් නෑෂ් ඊයේ සිදු වූ රිය අනතුරකින් සිය ජීවන සහකාරියද සමඟම සදහටම මෙලොව හැරදා ගියේය. ‘අ බියුටිෆුල් මයින්ඩ්’ (සොඳුරු සිතක්) නම් වූ අතිශය ජනප්‍රිය චිත්‍රපටය ඔහුගේ ජීවිත කතාව අලලා සැකසුනෙකි.

ජෝන් නෑෂ්ගෙන් ලොකුම දායකත්වයක් සැපයුනේ ක්‍රීඩා න්‍යායය (ගේම් තියරි) විෂයය කෙරෙහිය (වෙනත් පාරිභාෂික වචනයක් තිබිය හැකිය). පුද්ගලයන්ගේ මෙන්ම ආයතන වල ක්‍රමෝපායික චර්යාවන් අධ්‍යයනය කිරීම සඳහා ආර්ථික විද්‍යාව, ගණිතය, පරිගණක විද්‍යාව, පරිණාමික ජීව විද්‍යාව, දේශපාලන විද්‍යාව, කෘතීම බුද්ධිය (ආර්ටිෆිෂල් ඉන්ටලිජන්ස්), ආරක්ෂක හා සංග්‍රාමික විද්‍යා ඇතුළු ක්ෂේත්‍ර රැසක ක්‍රීඩා න්‍යායය යොදා ගැනේ.  ක්‍රමෝපායික චර්යාවන් අවසාන වශයෙන් නිශ්චිත ලෙස සමතුලිතතාවකට පත්වෙන (සංකීර්ණ න්‍යායයක් පිලිබඳ දළ අදහසක් පමණි.) නෑෂ් සමතුලනය ඔහුගේ ඉදිරිපත් කිරීමක් වන අතර ඔහු අනුව නම් කර ඇත. මේ සඳහා වූ නෑෂ්ගේ දායකත්වය සලකා 1994 දී ආර්ථික විද්‍යාව සඳහා පිරිනමන නොබෙල් ත්‍යාගය ඔහු වෙත පිරිනැමිණි. මෙයට අමතරව (ටිකක් බර දේවල් වන) අවකලනාත්මක ජ්‍යාමිතිය සහ රේඛීය නොවන අවකලනාත්මක සමීකරණ හා අදාළවද ඔහු විශාල දායකත්වයක් ලබා දී ඇත.

සාමාන්‍ය ජනතාව අතර නෑෂ් ප්‍රසිද්ධ වූයේ ඔහු කලක් පෙළුණු මානසික ආබාධයක් හේතුවෙන් දැක්වූ අසාමාන්‍ය චර්යාවන් නිසාය.මේ කාලයේදී රතු කරපටි පැළඳි සියළු දෙනාම ඔහුට පෙනුණේ ඔහුට එරෙහි රුසියානු කුමන්ත්‍රණකරුවන් ලෙසය. ඒ අනුව මේ ගැන ඇමරිකානු රජය දැනුවත්කරමින් නිර්දේශ ඉදිරිපත් කිරීමටද ඔහු නොපැකිලුනේය. කෙසේ වුවද ඔහුගේ බිරිඳගේ ආදර සත්කාර හා නිසි වෛද්‍ය ප්‍රතිකාර ලබා මේ මානසික ආබාධය සුවකරගත් නෑෂ් ඉන් පසුවත් විද්‍යාත්මක දැනුමට එක් කළ දේ බොහෝය. (දුඹුරු පැහැ සාටක නොපළඳින සැවොම අධිරාජ්‍යවාදී කුමන්ත්‍රණකරුවන් ලෙස පෙනීමද මෙම මානසික ව්‍යධියේ ලක්ෂණයක්දැයි ඉකොනොමැට්ටා හරියටම දන්නේ නැත. එසේනම් බෙහෙත් තිබේ. කිවුවේ නිකමටය.)

බියුටිෆුල් මයින්ඩ් කතා පුවත ගෙතෙන්නේ ඉහත සිදුවීම් මුල් කරගෙනය. ජනප්‍රිය සංස්කෘතියේ හමුවන ඉතා බුද්ධිමත්, එහෙත් සරල දේවල් පිලිබඳ අවබෝධයක් නැතිව පිස්සු කෙළින මහැදුරු චරිතය මෙන්ම, ඉතා රූමත් නමුත් එතරම් බුද්ධිමත් නොවන නිළියක හා විවාහ වන එතරම් කඩවසම් නැති එහෙත් ඉතා බුද්ධිමත් මහැදුරු චරිතයද බිහිවීම සඳහා නෑෂ්ගේ ජීවන තොරතුරු පාදක වීයැයි සැලකේ.

අසූ හය වසරක් ආයු වළඳා කුලීරථ රියදුරකුගේ නොසැලකිලිමත්කම නිසා ඊයේ හදිසියේ අපෙන් සමුගත් මහැදුරු ජෝන් නෑෂ් වෙනුවෙන් කෙටි සටහනකි.

 

http://economatta.blogspot.com/2015/05/blog-post_24.html

Related Posts

LankaViews

LankaViews

LankaViews

Video wall

‘නෙළුම් යාය’ බ්ලොග් සම්මාන උළෙල